- Imanol Pradalesek Airbusen instalazioak ere bisitatuko ditu, eta Carole Delga Okzitaniako presidentearekin eta bi ordezkaritzetako eta enpresa-sareko ordezkariekin elkartuko da
- Bidaiaren helburua negozio, berrikuntza eta lankidetza industrialerako aukera berriak bultzatzea da, eta aeronautikako fabrikatzaileak, klusterrak eta erreferentziako zentro teknologikoak bisitatuko dituzte
Imanol Pradales Lehendakariak gidatuko du astelehen honetan Euskaditik Toulouserako misio instituzionala eta enpresariala, helburu izango duena euskal industria aeroespazialerako aukera berriak irekitzea Europako gune aeronautiko eta espazial nagusietako batean. Misioak jarraipena emango dio lehendakariak eta Carole Delga Okzitaniako presidenteak 2025eko azaroaren 18an Parisen izan zuten bilerari. Topaketa horretan sortu zen Okzitaniako sektore aeroespazialera bisita enpresarial eta instituzionala antolatzeko ekimena.
Horrela, Lehendakaria astelehenean joango da Toulousera merkataritza-misioa lideratuz. Misio horrek barne hartuko ditu Airbusek Blagnacen dituen instalaziora bisita, Lehendakariaren eta Carole Delgaren alde biko bilera eta topaketa instituzionala bi ordezkaritzen eta enpresa-sarearen ordezkariekin.
Lehen jardunaldia urriaren 21era arte luzatuko den –Lehendakaria bertan izan gabe– misioaren abiapuntua izango da, eta misioan euskal enpresa eta erakundeetako 23 ordezkarik parte hartuko dute Eusko Jaurlaritzako Industria Sailak lagunduta, Mikel Jauregi sailburua buru dela. Helburua da bi lurraldeetako industria-ekosistemen arteko harremana sustatzea, fabrikatzaile handien hornidura-kateetan lankidetza-aukera berriak bideratzea eta berrikuntza- eta ikerketa-proiektu bateratuak sustatzea.
Bidaiaren dimentsio ekonomikoa alde batera utzita, asmoa da aldebiko harremana sakontzea eta lankidetza bien intereseko beste esparru batzuetara zabaltzea. Bi lurraldeek mugaz gaindiko lankidetza-esparruetan parte hartzen dute, hala nola Pirinioetako Lan Elkartean eta Europako POCTEFA programan.
Horrela, Eusko Jaurlaritzak harreman egonkorra finkatu nahi du administrazioen, enpresen, klusterren eta zentro teknologikoen artean, misio honetako harremanak industrian, berrikuntzan eta ekonomiaren garapenean lankidetzan jarduteko aukera berri bihurtzeko.
Bestalde, Airbus enpresara egingo den bisitaren bidez, ordezkaritzak konpainiaren instalazioak eta A321aren azken muntaketa-lerroa ezagutuko ditu, eta, gainera, hornidura-katearen beharrei eta berrikuntza-aukerei buruzko trukea egingo du. Bisita horri esker, Europako industria aeroespazialak ekoizpen-ahalmenaren, lehiakortasunaren eta erresilientziaren arloan dituen erronken aurrean euskal enpresek izan dezaketen betekizuna aztertu ahal izango da.
Aukera berriak sortzea
Lehendakariak lideratutako jardunaldi instituzionalaren ondoren, enpresa-ordezkaritzak bere programarekin jarraituko du urriaren 20an eta 21ean, Industria Sailak eta Basque Trade & Investmentek koordinatuta, Okzitaniako eskualdearekin eta sektoreko eragileekin lankidetzan.
Agendaren barruan Safran eta Liebherr-Aerospace aeronautikaren sektorean munduko lidergoa duten konpainiak bisitatuko dituzte, bai eta Aerospace Valley, IRT Saint Exupéry institutu teknologikoa, PAD’OCC eta Thales Alenia Space ere. Programari esker, Okzitaniako ekosistemaren gaitasun industrialak eta teknologikoak aurrez aurre ezagutu ahal izango dira eta etorkizuneko enpresa-lankidetzarako eta I+G proiektuetarako interes-esparruak identifikatuko dira.
Ordezkaritzak fabrikazio aurreratuari, makina-erremintari, osagai aeronautikoei eta ikerketa teknologikoari lotutako profilak biltzen ditu, eta BRTAn (Basque Research and Technology Alliance) integratutako enpresek, klusterrek eta zentroek parte hartzen dute.
Bi ekosistema industrial osagarri
Euskadik eta Okzitaniak industria-gaitasun osagarriak dituzte, eta harreman estrategikoa dute eremu aeroespazialean. Okzitaniak fabrikatzaile handiak eta nazioarteko helmena duen ekosistema aeronautiko eta espaziala biltzen ditu, eta Euskadik, berriz, motorretan, aeroegituretan, osagaietan, makina-erremintan, fabrikazio aurreratuan eta teknologia espazialetan espezializatutako enpresen sare sendoa du.
Euskadiko sektore aeroespaziala HEGAN klusterrari lotutako 82 entitatek osatzen dute. 2025ean 3.413 milioi euroko fakturazioa izan zuen eta 15.133 enplegu sortu zituen. Esportazioak 2.896 milioi eurokoak izan ziren, eta ikerketako eta garapeneko inbertsioa 213 milioi eurokoa izan zen.
Bestalde, Okzitaniak sektore aeroespazialari lotutako 817 enpresa ditu, eta 110.000 langile baino gehiago ditu jarduera horretan. Eskualdea, beraz, interes bereziko ingurunea da euskal enpresen merkataritza-harremanak zabaltzeko eta fabrikatzaile handiekin, hornitzaileekin eta ikerketa-zentroekin lankidetza-bide berriak jorratzeko.
Misioaren helburua osagarritasun horretaz baliatzea da Europako balio-kateak indartzeko, euskal enpresak industria-proiektu berrietan sartzea sustatzeko eta bi lurraldeen arteko lankidetza teknologikoa sendotzeko.
Informazio gehiago Irekia atarian (Leiho berrian irekiko da)